Framkvæmdir í Grafarholti (10. maí)

Sáð verður í 18. brautina og í sumar mun hún verða leiikin af gervigrasteig, sem sést á myndinni vinstra megin við brautina í um 125 metra fjarlægð frá miðju flatarinnar.
Ljósmynd tekin frá göngustígnum ofan við 1. teiginn. Á myndinni sést að nokkur grenitré hafa þurft að víkja fyrir nýrri staðsetningu á hvíta teignum.
Horft yfir 1. brautina. Rauði bráðabirgðateigurinn verður fyrir neðan göngustíginn og brautin mun því tímabundið styttast um nokkra metra. Nýtt flatarstæði er í skipulagi, suðvestan við núverandi flöt.

Umfang framkvæmdanna á 18. braut sést vel á þessari mynd. Gönguleiðir með gervigrasi verða lagðir, svo kylfingar þurfi ekki að vaða moldina í sumar.
Búið er að flytja ófá tonn af jarðvegi og grjóti, þar með taldar gömlu grjóthleðslurnar fyrir framan teiginn. Framundan er vinna við mótun nýrra teiga.
Frá öftustu teigum.

Horft frá þeim stað, þar sem ræsiskofinn stóð áður, en honum hefur verið komið fyrir í öruggt skjól á meðan að framkvæmdum stendur.
Breytingar á 1. og 18. braut eru aðeins fyrstu skrefin í allsherjar yfirhalningu Grafarholtsvallar. Eins og segir í fréttabréfi stjórnar frá 29. apríl og finna má á grgolf.is. ,,Helstu niðurstöður viðhorfskönnunar meðal félagsmanna eru að veikleikar Grafarholtsvallar séu ónóg gæði teiga, brauta, glompa og flata, og þá sérstaklega ósléttar brautir og hvers seinar flatirnar eru til á sumrin."
Hægt er að kynna sér framtíðaráætlun vallanna í fyrrgreindu fréttabréfi sem er að finna á slóðinni: https://grgolf.is/frettir/frett/frettabref-fra-stjorn-framtid-vallanna

Átjánda brautin hefur haft orð á sér fyrir að vera óslétt en vonir standa til þess að það heyri sögunni til. Brauitin er mun flatari en áður og hóll sem byrgði kylfingum sýn í upphafshöggum er horfinn.

Starfsfólk í veitingasölu var á þönum við að gera klárt enda aðeins fjórir dagar í opnun.
Gísli verktaki og Bjarni Grétar Sigurðsson, starfsmaður GR könnuðu framgang verksins.

Vilhelm Þórir Finnsson, garðyrkjustjóri klúbbsins og alt-muligt-mand, lagfærði ýmislegt smálegt í nágrenni við golfskálann.
Vafningar af gervigrasi á neðra bílastæðinu. Hluti þeirra verður notaður til að teppaleggja gönguleiðir að og frá 18. teig.
Þrátt fyrir að dagatalið segi 10. maí þá virðist sem græni liturinn sé meira áberandi, en í mörgum opnunarmótum undanfarinna ára. Kylfingar voru mættir til að æfa vippin og bílafjöldin fyrir utan Bása gefur vísbendingar um að þó nokkrir hafi verið að æfa sveifluna.