Leikið um GR-bikarinn frá 1978
Eitt þekktasta opna mót ársins og eitt það langlífasta er Opna GR. Mótinu var hleypt af stokkunum 1978. Ari Guðmundsson, fyrrum formaður GR og eiginkona hans Katla Ólafsdóttir, gáfu GR-bikarinn sem keppt skyldi um í 36 holu keppni með betri bolta fyrirkomulagi. Á fyrsta mótinu, 1978 var bifreið í verðlaun fyrir að fara holu í höggi, sem þá var nýmæli. Opna GR var í hugum margra einn af stórviðburðum hvers golfsumars og mikið stemningsmót eins og gjarnan fylgir liðakeppni og lengri mótum, þar sem leikið er um góð verðlaun. Fram undir aldamót voru skor liðanna færð inn handvirkt á stóra upplýsingatöflu í klúbbhúsinu í Grafarholti og þá freistuðust margir til að hinkra við í klúbbhúsinu til að fylgjast með breytingum á stöðu liða. Sá háttur hefur verið hafður á við verðlaunaafhendingu, að keppendur fá sjálfir að velja sér verðlaun, eftir þeirri röð sem þeir höfnuðu á mótinu.
Keppnisfyrirkomulag mótsins er eins og áður sagði, fjórmenningur, öðru nafni betri bolti þar sem tveir eru í hverju liði og betra skor liðsfélaga með forgjöf telur á hverri holu. Þetta fyrirkomulag gerir það að verkum að allir, forgjafarháir, sem lágir eiga svipaða möguleika, en þá þurfa keppendur að hitta á tvo góða daga og skor að falla vel saman. Dæmi eru um að forystulið eftir fyrri daginn, nái ekki að tryggja sér neitt af fjölmörgum vinningssætum að keppni lokinni, því keppnin í þessu móti er ávallt jöfn. Algengt er að vinningsskor sé 93-99 punktar.
Rúm fjörtíu ár eru síðan fyrsta mótið var haldið, en mótið féll niður árið 2016, sennilega vegna dræmra skráninga og sama var upp á teningnum rigningasumarið 2018. Opna GR er hins vegar komið á dagskrá að nýju og árið 2019 markar ákveðinn tímamót í sögu keppninnar, því keppt verður um bikarinn í 40. skipti helgina 27.-28. júlí.
