Ýmis kort (safnmappa)

Korpúlfsstaðavöllur, 27 holur (2013-)

Drög að 27 holu velli að Korpúlfsstöðum, unnin af golfvallarhönnuðinum Hannesi Þorsteinssyni. Völlurinn var tekinn í notkun árið 2013.

Golfvöllur í Gufunesi

Á árunum í kringum 1990 leit flest út að GR-ingar fengju völl í Gufunesi en stjórn klúbbsins hafði lengi beitt sér fyrir því að fá land hjá Reykjavíkurborg til að geta sinnt síauknum fjölda félagsmanna. Í skýrslu stjórnar GR árið1989 segir: "Í samráði við Reykjavíkurborg var hafin hönnun á nýjum golfvelli í Gufunesi. Formlega hefur GR ekki verið úthlutað þessu svæði, en allir sem um málið fjalla gera ráð fyrir, að við fáum þetta svæði. Enda hefur stjórn GR margoft látið í ljós áhuga sinn á svæðinu. Því til staðfestingar réðum við Geir Svansson til að hefja frumhönnun á fyrirhuguðu golfvallarsvæði í Gufunesi." (Kylfingur 1990, 3).

Golfvöllur í Mjóumýri og Kringlumýri 1954

Loftmynd frá svæðinu í Mjóumýri og Kringlumýri frá 1954. Inn á myndinni hafa golfbrautir verið litaðar og merktar með númerum. Einnig var reynt að merkja við útlínur flata og teiga eftir bestu getu, en sums staðar gat verið erfitt að greina það af myndinni og rétt er að hafa nokkurn fyrirvara á stærð flata og teiga. Nokkur mannvirki hafa verið merkt inn á myndina, klúbbhúsið sem stóð á útsýnisstað í Minni Öskjuhlíð, bæinn Efri Hlíð, sem nú er hús númer 68 við Stigahlíð og 3 útihús frá bænum sem stóðu skammt frá 6. flötinni. Á milli golfvallarins og Miklubrautar voru kálgarðar, reitir sem úthlutað var til bæjarbúa sem vildu rækta kál eða kartöflur og sjást þeir vel efst á myndinni. Loftmynd: Borgarvefsjá.

Landsvæðið í Mjóumýri og Kringlumýri 2014

Með því að bera saman loftmyndir frá landsvæði í Mjóumýri og Kringlumýri frá 1954, þegar golfvöllur var á svæðinu við nýlega loftmynd af sama svæði, er hægt að sjá legu golfbrautanna á svæðinu. Á þessari mynd frá 2014, hafa brautir golfvallarins frá því 1954 verið felldar inn í það gjörbreytta landslag sem við þekkjum í dag. Loftmyndir 1954 og 2014 teknar af Borgarvefsjá. /Frosti

Uppdráttur með örnefnum (1963)

Uppdráttur með örnefnum í nágrenni Grafarholts og Korpúlfsstaða, sem unnin var árið 1963 af Steindóri Björnssyni í Gröf, að beiðni Þorvarðar Árnasonar, eins framámanns í Golfklúbbi Reykjavíkur. Uppdrátturinn hékk lengi í klúbbhúsinu í Grafarholti en er nú geymdur á Korpúlfsstöðum. Höfundur er óþekktur.

Golfvöllurinn við Öskjuhlíð (1937-63)

Teikning gerð af Gísla Halldórssyni arkitekt af golfvellinum við Öskjuhlíð. Tjörnin sem sést fyrir miðju myndarinnar var oft kölluð Golftjörnin og notuð sem skautasvell af börnum og unglingum í nýju íbúðahverfunum í Hlíða- og Háaleitishverfi. Á þeim stað þar sem tjörnin er reis síðar Borgarleikhúsið. Teikning; Gísli Halldórsson (1997).

Teikning Rube - Mjóumýri

Rube Arneson, virðist hafa stuðst við teikningu bróður síns Walt, sem var kennari klúbbsins á fyrstu tveimur árunum. Inn á vallarteikninguna eru komnar glompur og fleiri tillögur að nýjum flötum. Teikning er dagsett sama dag og teikning Walter á síðunni á undan en Rube var golfkennari klúbbsins 1938-9.

Teikning Rube af vellinum í Mjóumýri

Teikning Rube Arneson, golkennara hjá Golfklúbbi Íslands 1938-9 af golfvellinum í Mjóamýri. Walt, yngri bróðir Rube hannaði golfvöllinn að mestu leiti árið 1936 en sá aldrei hugmyndir sínar í ,,praxis" þar sem hann hafði yfirgefið landið þegar golfvöllurinn opnaði þann 20. júlí 1937. Rube kom ári síðar og hefur sennilega fengið það verkefni að ljúka hönnun vallarins. Í Kylfingi 1938 segir meðal annnars: ,,Og Rube hefir ekki legið á liði sínu. Nú síðustu dagana hefir hann setið á teiknistofu Golfklúbbsins og teiknað „semi-permanent greens", sandgryfjur og fleiri forvöð fyrir kylfur og bolta, sem búa á út í nánustu framtíð á vellinum." Númeraröð á teikningu Rube er talsvert frábrugðin þeirri númeraröð sem leikin var við vígslu vallarins 1938 eins og sést á teikningunni. Teikning Rube hefur hangið á vegg í mótaherbergi klúbbsins í Grafarholti.

Land Golfklúbbs Íslands í Mjóumýri 1936

Uppdráttur af landsvæði því sem Golfklúbbur Íslands fékk á leigu frá Reykjavíkurbæ. Teikningin var gerð haustið 1936 og stefna golfbrauta hefur verið merkt inn á kortið.

Plan #2 eftir Walt Arneson

Tillaga að vallarskipulagi golfvallarins í Mjóumýri. Teikningin er nokkuð frábrugðin endanlegu skipulagi og tvær mismunandi tillögur eru að flatarstæðum á 1. og 9. holu. Fyrsta holan er sunnan við hitaveitustokkinn, norðan Bústaðavegar. Teikningin er merkt Walter Arneson og dagsett í júlí 1938, og hefur sennilega verið send frá Danmerku, þar sem hann fór frá Íslandi haustið áður.

Uppdráttur af landinu í Mjóumýri og frumdrög

Uppdráttur af golfvallarlandinu í Mjóumýri, Kringlumýri og Minni-Öskjuhlíð sem klúbburinn hafði til umráða 1937-63.

Golfvöllur í Austurhlíð, Laugardal

Teikning og skýringar Gísla Halldórssonar arkitekts af fyrsta golfvelli landsins í Laugardal í Reykjavík. Á teikningunni má sjá legu Rauðalækjar að gömlu sundlaugunum.

Golfvöllur í Mjóamýri og seinni byggð á svæðinu

Teikning Gísla Halldórssonar af landinu í Móamýri. Merktar hafa verið inn á kortið síðari byggingar sem risið hafa á svæðinu og lega gömlu golfbrautanna er jafnframt teiknuð inn á til að sýna hvar þær lágu. Teikning: Gísli Halldórsson (1997).

Golfvöllur í Austurhlíð, Laugardal 1935-7

Uppdráttur Gísla Halldórssonar frá 1997 af fyrsta golfvelli landsins Austurhlíð í Laugardal, sem leikið var á á árunum 1935-7.Jafnframt eru sýndar byggingar sem voru á vallarsvæðinu, 60 árum eftir að Golfklúbbur Íslands, flutti starfsemina í Mjóumýri. Uppdrátturinn er ekki nákvæmur enda hafði Gísli við lítið annað að styðjast en lýsingar Jóhanns Eyjólfssonar, félaga í klúbbnum, sem leikið hafði á vellinum á unglingsárunum. Teikning: Gísli Halldórsson (1997).

Gamli völlurinn í Mjóumýri

Ljósmynd sem hangir uppi í Húsi verslunarinnar. Merktir eru inni á kortið ýmsir staðir, gamlir og nýir. Ljósm: óþekktur.

Örnefni Grafarholts og nágrennis

Örnefnaskráning Guðlaugs R. Guðmundsson, (1977) af Grafarholti og nágrenni.